ആകെ പേജ്‌കാഴ്‌ചകള്‍

2014, സെപ്റ്റംബർ 2, ചൊവ്വാഴ്ച

ചോരക്കളി




ചോരക്കളിയിനി വേണ്ട, മണ്ണിലു-
യർത്തുക നമ്മൾ ശാന്തീമന്ത്രം
കാരുണ്യത്തിൻ മുല്ലപ്പൂവുകൾ
 ചോരയുണങ്ങാൻ വിതറീടുക നാം

ഇതിഹാസങ്ങൾ, വടക്കൻ പാട്ടുകൾ
നമ്മിലുണർത്തീ സമരാവേശം
അതിമോഹം താൻ സർവ്വ വിപത്തിനു-
മോർക്കിൽ കാരണമെന്നറിയുന്നേൻ

മതിയാക്കുക നാം ക്രൂരത, വന്യമൃ-
ഗങ്ങൾ പോലും മർത്ത്യർ കാട്ടും
അതിഭീകരമാം ചെയ്തികൾ കണ്ടു ശി-
രസ്സു കുനിച്ചു ശപിക്കുന്നുണ്ടാം

ഇനിയൊരു യുദ്ധം വേണ്ടാ, മണ്ണിൽ,
വിണ്ണിൽ, നമ്മുടെ നാട്ടിൽ, വീട്ടിൽ
കിനിയട്ടെ കനിവിൻ തേൻ തുള്ളികൾ
ചോരത്തുള്ളികൾ ചിന്തിയ വഴിയിൽ

ഹിമഗിരി ചൂഴും കാർഗിൻ നെറുകയി-
ലിന്ത്യ തൊടീച്ചൊരു കുങ്കുമതിലകം
നിരവധിയംഗനമാരുടെ നെറ്റിയിൽ
നിന്നുമടർത്തിച്ചാർത്തിയതല്ലോ !

വിരഹച്ചൂടിൽ കരിയും കരളുക-
ളായിരമിവിടെ അനാഥർ പെരുകും
ധരയാണിവിടം “ഭ്രാന്താലയമെൻ
കേരള“മെന്നു പറഞ്ഞാൽ സത്യം !

ഇവിടെ തേടി നടപ്പൂ ദ്രൌപദി-
മാരെ ദുശ്ശാസനരും, സീതയെ
കപട പരാശരിവേഷം പൂണ്ടു
നടക്കും രാവണരും തെരുതോറും

അധികാരത്തിൻ മോഹച്ചൂടിൽ 
പൊട്ടും ബോംബുകൾ തട്ടിയെടുപ്പൂ
അരുമക്കുഞ്ഞിൻ കൈയും കാലും
കണ്ണും പുതിയൊരു സംസ്കാരം പോൽ

മതിയാക്കുക നാം നരബലി: വാളും
പരിചയുമെറിയുക ദൂരെ, രക്ത-
ക്കൊതിയിൽ നേടുക ദുരിത മാത്രം
ഓർത്താൽ സർവ്വവിനാശം നേട്ടം !

ഇനിയീ ചാവേർ വേണ്ട, മണ്ണി-
ലുയർത്തുക നമ്മൾ  മൈത്രീ മന്ത്രം
കനിവിൻ തുമ്പപ്പൂവുകൾ ചോരയു-
ണങ്ങിയ വീഥിയിൽ വിതറീടുക നാം.




11 അഭിപ്രായങ്ങൾ:

  1. വരികൾ ഏറെ ഇഷ്ടമായി..
    കനിവിൻ തുമ്പപ്പൂവുകളും.
    കാരുണ്യത്തിൻ മുല്ലപ്പൂവുകളും.
    എന്നും മൊട്ടിട്ടു വിരിഞ്ഞുവെങ്കിൽ എന്ന് ആശിക്കുന്നു..
    ആശംസകൾ മധു സാർ.

    മറുപടിഇല്ലാതാക്കൂ
    മറുപടികൾ
    1. സന്തോഷം ഗിരീഷ്. . ആശിക്കുന്നപോലെ നടക്കാൻ ഇടവരട്ടെ !

      ഇല്ലാതാക്കൂ
  2. "ഹിമഗിരി ചൂഴും കാർഗിൻ നെറുകയി-
    ലിന്ത്യ തൊടീച്ചൊരു കുങ്കുമതിലകം
    നിരവധിയംഗനമാരുടെ നെറ്റിയിൽ
    നിന്നുമടർത്തിച്ചാർത്തിയതല്ലോ !" ഈ വരികൾ ഏറെയിഷ്ടപ്പെട്ടു.

    മറുപടിഇല്ലാതാക്കൂ
  3. നല്ല കവിത..
    ന്യൂ ജനറേഷന്‍ കവിതയല്ല...ഈണമോക്കെ ചേര്‍ത്ത്‌ ആലപിക്കാം
    ഭാവുകങ്ങള്‍

    മറുപടിഇല്ലാതാക്കൂ
    മറുപടികൾ
    1. നന്ദി അഹമ്മദ് സാബിത്. ഈ വരവിനും അഭിപ്രായം കുറിച്ചതിനും. ന്യൂ ജനറേഷൻ കവിതകൾ എഴുതാനുള്ള വ്യുല്പത്തി എനിക്കില്ല

      ഇല്ലാതാക്കൂ
  4. യുദ്ധവും ചോരത്തുള്ളികളുമില്ലാത്ത ഒരു നാളേക്കുവേണ്ടി ഞാനും പ്രാർഥിക്കുന്നു ....നല്ല വാക്കുകൾ ..നല്ല വരികൾ ..

    മറുപടിഇല്ലാതാക്കൂ